Þotan „hönnuð af trúðum“

Birting innanhúss-skilaboða hjá bandaríska flugvélaframleiðandanum Boeing hefur vakið fleiri spurningar um öryggi Boeing 737 Max-farþegaþotanna. Meðal þeirra eru samskipti milli starfsmanna þar sem starfsmaður segir að þotan hafi verið „hönnuð af trúðum“.

Boeing hefur upplýst um og birt hundruð skilaboða í þeim tilgangi að auka gagnsæi hjá félaginu. Segir félagið að sumt sem þar komi fram sé algjörlega óásættanlegt.

737 Max-farþegaþotur hafa verið kyrrsettar frá því í mars í fyrra eftir tvö mannskæð flugslys sem kostuðu tæplega 350 manns lífið.

Bandarísk flugmálayfirvöld og bandaríska þingið fengu í síðasta mánuði afhenta óritskoðaða útgáfu af samskiptum milli starfsmanna Boeing.

Í skilaboðum frá apríl 2017 svarar ónefndur starfsmaður öðrum á þennan veg: „Þessi flugvél er hönnuð af trúðum sem eru undir eftirliti frá öpum.“ 

Í öðrum skilaboðum frá nóvember 2015 kemur fram að fyrirtækið beitti sér gegn því að eftirlitsaðilar með flugi fengju upplýsingar varðandi þjálfun í flughermi. „Við munum þrýsta á þetta af fullum þunga og munum væntanlega þurfa á stuðningi að halda úr efstu lögum þegar kemur að lokasamningaviðræðunum,“ segir í skilaboðunum.

Í febrúar 2018 spyr starfsmaður Boeing starfsbróður sinn hvort hann myndi fara með fjölskyldu sína um borð í Max-þotu sem stýrt er með stafrænum hætti og bætir við að það myndi hann ekki sjálfur gera. Starfsbróðir hans svaraði neitandi. 

Frétt BBC

Frétt New York Times

• 2 blogg um fréttina

Bloggað um fréttina

• Gústaf Adolf Skúlason: "Samgöngur Reykjavíkur hannaðar af trúðum und­ir eft­ir­liti frá öpum"
• Ómar Ragnarsson: Meira en tuttugu ára ferill?