Taal gæti spúð ösku í margar vikur

Eldfjallið Taal á Filippseyjum gæti spúð hrauni og ösku í margar vikur, samkvæmt yfirvöldum þar í landi. Tugir þúsunda íbúa í grenndinni hafa lagt á flótta frá heimilum sínum af ótta við öflugt sprengigos í fjallinu, sem rumskaði af krafti á sunnudag.

Taal er sunnan við Manilla, höfuðborg Filippseyja. Margir sem lögðu á flótta undan eldshræringunum fóru í miklum flýti af svæðinu.

Frétt af mbl.is

Þúsundir yfirgefa heimili sín af ótta við eldgos

„Við skildum allt eftir nema fötin sem við stöndum í,“ segir sjómaðurinn Robert Cadiz í samtali við AFP-fréttastofuna, en hann er einn af yfir 30 þúsund íbúum sem nú hafast við í neyðarskýlum og vita ekkert hvenær þeir komast heim á ný. „Við vorum skelfingu lostin,“ segir hann um sig og sína.

Öskufallið frá Taal hefur litað borgina Tagaytay, sunnan við Manilla, gráa. AFP

Gerald Aseoche er þrítugur fjögurra barna faðir, sem hélt af stað frá hættusvæðinu án þess að taka mikið með sér, nema jú auðvitað börnin. Í samtali við AFP segist hann vonast til þess að eldhræringarnar standi ekki lengi yfir, þar sem hann missi vinnu sína sem málari ef hann komist ekki skjótt aftur til starfa.

Frétt af mbl.is

„Farið að líkjast öskufallinu úr Eyjafjallajökli“

Enn hætta á sprengigosi

Taal er eitt virkasta eldfjall Filippseyja og gaus síðast árið 1977, en þar áður hafði fjallið gosið árið 1965. Þá létust 200 manns í umbrotunum.

Renato Solidum, forstöðumaður jarðfræðistofnunar landsins, segir að mögulega séu mánuðir þar til eldfjallið leggist í dvala á ný. Enn er hætta á að sprengigos verði – og sú viðvörun gæti varað í margar vikur. Á meðan svo er er ekki óhætt fyrir þá sem ruku að heiman á sunnudag að snúa til baka.

• 1 blogg um fréttina

Bloggað um fréttina

• Geir Ágústsson: Engin skattlagning getur tamið náttúruna