90% karla leiðinleg

„Allar mínar hetjur eru konur. Gegnum tíðina hafa 90% karla hér um bil drepið mig úr leiðindum. Konur hafa kennt mér allt sem ég kann,“ segir breski leikarinn Brian Blessed í eldhressu samtali við breska blaðið The Guardian.

Blessed hefur löngum þótt hrjúfur, alltént á yfirborðinu, en upplýsir í samtalinu að hann eigi sér viðkvæma og feminíska hlið. Blessed, sem er 83 ára, hefur unnið mikið með Kenneth Branagh en kveðst í samtalinu vona að því samstarfi sé lokið. „Vinátta okkar er miklu mikilvægari en að vera í einhverjum kvikmyndum, þannig að við sömdum um að hann leikstýrði mér ekki oftar.“