Lokun verksmiðja, mikil röskun á flugumferð og umferð almennt í heiminum sökum útbreiðslu kórónuveirunnar hefur lítil áhrif á loftslagsbreytingar, eða að minnsta kosti takmarkaðar. Þetta er mat Alþjóðaveður­fræðistofn­unar Sam­einuðu þjóðanna, WMO. 

Lars Peter Riishøjgaard, talsmaður stofnunarinnar, segir að aðeins sé um skammgóðan vermi að ræða. Hann segir að ef litið er til skammtímaáhrifa eru þau þó nokkur, útblástur koltvíoxíðs minnkar með minnkandi bíla- og flugumferð. 

„En við búumst við því að áhrifin muni ekki vara lengi,“ sagði hann á fjarblaðamannafundi í dag. 

„Faraldrinum lýkur á einhverjum tímapunkti og þá snýr heimsbyggðin aftur til sinna starfa, útblástur mun aukast á ný,“ bætti hann við. 

Áhrifin eru orðin sýnileg sums staðar, til að mynda má merkja minni mengun í borgum eins og Nýju Delí, höfuðborg Indlands, en hana má nær eingöngu rekja til minni bílaumferðar. 

Riishøjgaard segir að áhrifin, ef einhver verða, verði í mesta lagi þau að yfirvöld endurhugsi afstöðu sína gagnvart loftslagsvánni. 

Sænski loftslagsaðgerðasinninn Greta Thunberg hefur bent á að þegar kórónuveirufaraldrinum lýkur og „allt fer í sama farið“ er ýmislegt sem þarf að ræða þar sem „sama farið“ var í raun hættuástand. 

Tengdar fréttir

Loftslagsvá

„Kæra fullorðna fólk“

• „Börn eru að upplifa holskeflu breytinga“
• Yfir 1.000 jöklar bráðnað í landinu
• „Við erum á leið til glötunar“
• Berjast áfram gegn hlýnun þrátt fyrir sigur Trumps

» Fleiri tengdar fréttir

Kórónuveiran Covid-19

Í fimm ára fangelsi fyrir að hvetja til hryðjuverka

• Stefna Norðmenn ríkinu vegna bólusetninga?
• 30% með langvarandi áhrif covid
• Mættu hafa í huga þar sem þeir kvarta á Tene
• „Er ég virkilega að deyja?“

» Fleiri tengdar fréttir

• 1 blogg um fréttina

Bloggað um fréttina

• Ásgrímur Hartmannsson: Auðvitað, segir sig sjálft