Það hefur verið áhugavert að fylgjast með Donald Trump, forseta Bandaríkjanna, á daglegum fundum um kórónuveiruna í vikunni. Sjálfsöryggið er mikið og meðan á fundunum stendur fær maður á tilfinninguna að nú sé hreinlega stutt í að faraldurinn endi. Bandarísk stórfyrirtæki og herinn séu komin í málið og þá sé náttúrlega stutt í að það sé úr sögunni. Sú tilfinning er þó ekki lengi að breytast þegar fundurinn er búinn og sýnt er frá því sem er að gerast í landinu. Hvort sem það er í New York, Kaliforníu eða Suðurríkjunum. Þar er ástandið vont og hraðversnar.   

Smitum fjölgar og dauðsföllum sömuleiðis en þau voru 1.200 undanfarinn sólarhring. Þau eru orðin fleiri en sex þúsund og verða líklega orðin flest á heimsvísu í næstu viku. Spár gera ráð fyrir að þau geti orðið á bilinu 100-240 þúsund á næstu mánuðum.

Krísan bætist við ástand þar sem hugmyndafræðilegur ágreiningur hefur dýpkað verulega á síðustu áratugum. Pólitískar skotgrafir hafa dýpkað og enginn forseti hefur verið jafn umdeildur og Trump. „Á undanförnum árum og áratugum hefur orðið miklu meiri gjá í bandarísku þjóðlífi heldur en áður var. Það þjóðfélag sem áður var var svolítið þéttriðið og menn höfðu sameiginleg gildi sem sameinaði Bandaríkjamenn að miklu leyti. Þau hafa trosnað verulega,“ segir Eiríkur Bergmann stjórnmálafræðingur en rætt er við hann í myndskeiðinu um stöðuna í bandarískum stjórnmálum sem sjaldan hefur reynt jafn mikið á og núna. Framundan eru svo forsetakosningar þar sem Trump freistar þess að ná kjöri að nýju. Ekki er langt síðan útlit var fyrir að honum myndi takast það en síðustu vikur hafa gjörbreytt landslagi stjórnmálanna vestra.