Erlent | AFP | 26.6.2020 | 22:15 | Uppfært 27.6.2020 23:39

Eiga við „alvarlegt vandamál“ að stríða

Anthony Fauci hefur leitt sóttvarnateymi Hvíta hússins. AFP

Dr. Anthony Fauci, sem leitt hefur stýrihóp Hvíta hússins gegn kórónuveirufaraldrinum, sagði í gær að Bandaríkin stæðu frammi fyrir „alvarlegu vandamáli“ vegna veirunnar. Texas- og Flórída-ríki hafa bæði skipað börum að hætta að veita áfengi, en fjöldi nýrra tilfella í ríkjunum hefur aldrei verið meiri.

Um það bil 50 milljón manns búa samtals í ríkjunum tveimur, en þau þóttu komast tiltölulega létt frá faraldrinum í vor. Voru ríkisstjórar beggja ríkja því í fararbroddi þeirra sem vildu létta á samkomubanni tiltölulega fljótt á ný, jafnvel þó að ekki hefði tekist að ná fullum tökum á faraldrinum.

Nærri því 125.000 manns hafa nú látist af völdum kórónuveirunnar í Bandaríkjunum, en það er langhæsta dánartala vegna faraldursins í heiminum til þessa. Ólíkt Evrópu hefur fyrsta bylgja faraldursins í Bandaríkjunum ekki náð að hjaðna niður, og sagði Mike Pence varaforseti í dag að nýjum tilfellum veirunnar í Bandaríkjunum hefði fjölgað um meira en 40.000 á einum degi.

Á fyrsta blaðamannafundi Hvíta hússins um ástandið í tvo mánuði lagði Fauci hins vegar áherslu á að landið allt væri samtengt, og að þau svæði sem nú stæðu betur gætu ekki gengið að neinu vísu. „Eina leiðin fyrir okkur til að binda endi á þetta er ef við gerum það saman,“ sagði Fauci.