Misheppnaðasti blaðamannafundur sögunnar?
Setja bókamerki
Blaðamannafundur Rudys Giulianis, lögmanns Donalds Trumps Bandaríkjaforseta, í gær hefur vakið þó nokkra athygli. Ekki aðeins fyrir það að á meðan fundinum stóð lýstu fjölmiðlar víða um heim yfir sigri mótframbjóðanda Trumps, Joes Bidens, heldur einnig fyrir staðsetninguna.
Trump boðaði til fundarins með skömmum fyrirvara snemma í gærmorgun og átti fundurinn að fara fram á Four Seasons Total Landscaping í Philadelphia í Pennsylvaníu klukkan 11:30 að staðartíma. Klukkan 16:30 að íslenskum. Eðlilega töldu margir að um væri að ræða Four Seasons-hótelið þar í bæ en hótelið greindi hins vegar strax frá því að blaðamannafundurinn hefði ekki verið bókaður hjá þeim.
Þá fóru blaðasnápar á stúfana og slógu heimilisfangið inn í leitarvélar og fundu lítið garðyrkjufyrirtæki staðsett í iðnaðarhverfi í borginni. Við hliðina á garðyrkjufyrirtækinu er klámbókabúð og beint á móti líkbrennsla.
Á bílastæðinu fyrir utan garðyrkjufyrirtækið í iðnaðarhverfinu var svo blaðamannafundurinn haldinn. Ekki hefur verið gefið út hvort einhver mistök við skipulagningu fundarins hafi valdið því að hann fór fram á þessum stað.
Giuliani lét engan bilbug á sér finna þótt fundurinn væri á heldur óvanalegum stað og talaði um hvað myndi felast í baráttu forsetans gegn því sem hann telur vera kosningasvindl.
Giuliani sagði að Trump hefði átt að vinna í Pennsylvaníu og dró fram þrjá eftirlitsmenn við kosningarnar sem sögðu að komið hefði verið í veg fyrir að þeir fengju að fylgjast vel með talningunni. Hann hét því enn fremur að Trump myndi fara í fjölda málsókna vegna talningar atkvæða.
Á miðjum fundi kom svo í ljós að allir helstu fjölmiðlar heims hefðu lýst yfir sigri Bidens og greindu blaðamenn á fundinum Giuliani frá þeim fregnum. Þá sagði Giuliani: „Ekki þessa vitleysu. Sjónvarpsstöðvarnar fá ekki að ákveða hver fer með sigur af hólmi. Dómstólarnir gera það.“
„Höfum sloppið bærilega með skaða af þessu gosi“
Sjötti ferðamaðurinn er látinn
Hentugt gos fyrst gýs á annað borð
Rússar sagðir útvega N-Kóreu milljón olíutunnur
Hópur fólks reyndi að komast að eldgosinu
Nýtt fangelsi í landi Stóra-Hrauns tilbúið 2028
Viðræður ekkert þokast frá því á þriðjudag