Biden tekur upp tólið
Setja bókamerki
Joe Biden, forseti Bandaríkjanna, hringdi í gær í Justin Trudeau, forsætisráðherra Kanada. Var það fyrsta símtal Bidens við erlendan þjóðarleiðtoga frá því hann tók við völdum á miðvikudag.
Samkvæmt upplýsingum frá Hvíta húsinu varði símtalið í um þrjátíu mínútur og ræddu leiðtogarnir meðal annars um að styrkja samvinnu ríkjanna á sviðum efnahagsmála, varnarmála og samskipta á alþjóðasviði.
Þá ræddu þeir kórónuveirufaraldurinn og áhrif hans á samskiptin, en landamæri ríkjanna hafa verið lokuð fyrir „ónauðsynlegum ferðum“ frá því í mars. Í símtalinu lýsti Trudeau yfir vonbirgðum sínum með þá ákvörðun forsetans að afturkalla leyfi fyrir Keystone XL olíuleiðslunni, sem leggja á frá Alberta í Kanada til Nebraska í Bandaríkjunum.
Leiðtogarnir sammæltust einnig um að ræða aftur saman í næsta mánuði, annaðhvort í gegnum síma eða í eigin persónu.
Í kjölfarið hringdi Biden í Andrés Manuel Lopez Obrador, forseta Mexíkó. Lopez Obrador greinir frá því á Twitter að þeir hafi rætt um innflytjendamál, kórónuveiruna og samstarf ríkjanna og hafi samskipti þeirra verið vinsamleg og einkennst af virðingu.
Funda með þingflokkum
„Tímabil aukinnar eldvirkni“
„Þetta er ríkisstjórn almannahagsmuna“
Fyrsti blaðamannafundurinn í heild sinni
Þetta eru ráðherrar ríkisstjórnarinnar
Alvarleg netárás á Wise
Barn lést í árásinni
