Þingið studdi Trudeau

Kanadíska þingið gekk til atkvæðagreiðslu í gærkvöldi um neyðarlög sem sett voru vegna þriggja vikna borgaralegra mótmæla í Kanada. Atkvæði fóru þannig að 185 greiddu atkvæði með því að beita neyðarlögunum en 151 var á móti.

Justin Trudeau forsætisráðherra landsins setti lögin á í síðustu viku.

Frétt af mbl.is

Örlagarík atkvæðagreiðsla í kvöld

Ekki kom á óvart að atkvæði féllu eftir pólitískum línum og voru hægrimenn andvígir beitingu laganna en stjórnarliðar og stuðningsmenn þeirra hlynntir aðgerðunum.

Trudeau hafði í ræðu varið beitingu laganna fyrr í gær og sagði að ástandið í landinu væri enn viðkvæmt og það yrði að koma í veg fyrir hömlun umferðar í landinu en lofaði um leið að lögin yrðu ekki í gildi lengur en væri algjörlega nauðsynlegt.

Frétt af mbl.is

Beittu kylfum og piparúða gegn mótmælendum

Lögin gefa mikið vald

Neyðarlögin sem samþykkt voru á þinginu árið 1988 gefa stjórnvöldum mikið svigrúm til aðgerða ef neyðarástand skapast í landinu, en 30 daga rammi er gefinn til að beita lögunum ef þau eru ekki endurnýjuð sérstaklega.

Lögin kveða á um að stjórnvöld hafi heimild til þess að banna fjöldasamkomur, hamla umferð á skilgreindum svæðum auk þess að stjórnvöld fá vald til þess að frysta bankareikninga, svo þau gefa stjórnvöldum mjög mikið vald og eru umdeild eftir því.

Frétt af mbl.is

Ottawa friðsæl á ný

Frystir bankareikningar

Fram kom á laugardag að stjórnvöld hefðu fryst 76 bankareikninga tengda mótmælunum og þannig fryst 3,2 milljónir kandadadollara. Að sögn yfirvalda hafði reikningum áhrifamanna í mótmælunum verið læst og þeirra vörubílstjóra sem hefðu neitað að yfirgefa svæðið.

Chrystia Freeland fjármálaráðherra Kanada sagði að það væri auðveld leið að opna reikningana aftur. „Hættið að taka þátt í að hamla allri umferð.“

Þetta er í fyrsta skipti sem lögunum er beitt í Kanada.

• 1 blogg um fréttina

Bloggað um fréttina

• Geir Ágústsson: Frétt! Stjórnvöld styðja eigin stjórn!