Höfðar mál vegna samsæriskenninga fjölmiðils

Írsk móðir hefur höfðað mál gegn dagblaði þar í landi vegna umfjöllunar dagblaðsins um dauða sonar síns, en í umfjölluninni er að finna ofsafengnar samsæriskenningar sem ranglega fullyrða að sonur hennar hafi látist af völdum Covid-19-bóluefnisins. BBC greinir frá. 

Í málsókninni kemur fram að írski fjölmiðillinn „The Irish Light“ hafi ítrekað brotið gegn móður drengsins, Edel Campbell, með umfjöllun sinni á vefsíðu dagblaðsins.

Sögðu drenginn hafa látist vegna bóluefnisins

Í umfjöllun sinni á síðasta ári hélt The Irish Light fram að sonur Campbell hafi verið á meðal 41 einstaklings sem lést vegna Covid-19-bóluefnisins, en sú var ekki raunin. Drengurinn, sem var einungis 18 ára þegar hann lést, féll fyrir eigin hendi í ágúst 2021.

Í kjölfar málsóknarinnar hafa Campbell og lögfræðingi hennar borist fjöldi líflátshótana frá lesendum fjölmiðilsins. Þá hafa dagblaðið og ritstjóri þess einnig ásakað Campbell um svívirðilegar lygar, stórfelld svik og gefið í skyn að hún gangi ekki heil til skógar. 

Róttækar samsæriskenningar algengar

Í umfjöllun BBC kemur fram að samsæriskenningasmiðir um allan heim hafi á undanförnum árum notfært sér tugi hörmulegra dauðsfalla til þess að dreifa röngum upplýsingum og áróðri um bóluefni gegn Covid-19 og er málið því ekki einsdæmi.

Þetta mun þó vera í fyrsta sinn sem ættingi höfðar mál gegn fjölmiðlinum, sem þekktur er þar í landi fyrir róttækar samsæriskenningar.

„Ég skil vel aðstandendur þeirra sem verða fyrir ærumeiðingum af þessu tagi,“ segir lögmaður Campbell í samtali við BBC, en í kjölfar bakslagsins sem hefur fylgt málsókninni segir Campbell að fjölmiðillinn hafi gert líf sitt að helvíti og að nú sé hún hrædd við að tjá sig.

• 1 blogg um fréttina

Bloggað um fréttina

• Geir Ágústsson: Lygar eru ekki samsæriskenningar