TikTok áminnt fyrir upplýsingaóreiðu

Samfélagsmiðillinn TikTok hefur fengið áminningu frá Evrópusambandinu fyrir dreifingu efnis sem talið er bæði ólöglegt og misvísandi. Þær upplýsingar sem töldust rangar hverfðust einkum um árás Hamas-liða á Ísraelsríki. Þess var krafist að TikTok brygðist nánast tafarlaust við með útlistunum á því hvernig miðillinn hygðist sporna við upplýsingaóreiðu. 

Aðrir samfélagsmiðlar, svo sem X (áður Twitter) og Meta, hlutu einnig svipuð fyrirmæli um að bregðast við rangfærslu upplýsinga fyrr í vikunni.

Notendur oftar en ekki börn og unglingar

Í bréfi til framkvæmdarstjóra miðilsins kom fram að TikTok bæri sérstök skylda til að vernda notendur sína frá ofbeldisfullu efni svo sem gíslatökum. Þetta væri í ljósi þess að miðilinn væri einstaklega vinsæll meðal barna og unglinga, sem bæri að hlífa við áhorfi á slík myndskeið. Ekki væru nægilegar ráðstafanir gerðar til að stemma stigu við dreifingu ógeðfellds efnis á miðlinum. 

Samfélagsmiðlar þurfa að bregðast við brjóti efni í bága við lög ESB eða aðildarríkja þess. Geri þeir það ekki geti það leitt til hárra sekta eða jafnvel þess að þeir verði bannaðir í Evrópu. 

Frétt af mbl.is

Telja upplýsingaóreiðu mesta á X

• 1 blogg um fréttina

Bloggað um fréttina

• Geir Ágústsson: Þarf maður að stofna TikTok-reikning núna?