Erlent | AFP | 8.11.2023 | 23:32 | Uppfært 9.11.2023 11:16

Vísar sögum af hugsanlegu vopnahléi á bug

Benjamín Netanjahú, forsætisráðherra Ísraels, segir að vopnahlé í stríði Ísraels gegn hryðjuverkasamtökunum Hamas sé ekki að fara að gerast nema öllum gíslum sé sleppt. AFP/Abir Sultan/Pool

Benjamín Netanjahú, forsætisráðherra Ísraels, vísar öllum sögum um hugsanlegt vopnahlé á Gasasvæðinu á bug. Ísraelski herinn segir einnig að Hamas-hryðjuverkasamtökin hafi nú „misst stjórn“ á norðanverðu svæðinu.

Margir fjölmiðlar greindu frá því fyrr í dag að heimildarmenn með tengsl við hryðjuverkasamtökin Hamas hefðu sagt viðræður standa yfir er snúa að því að samtökin sleppi tólf gíslum úr haldi, þar af sex bandarískum ríkisborgurum, gegn þriggja daga vopnahléi á Gasasvæðinu, til að hægt sé að gera Egyptum kleift að veita mannúðaraðstoð í lengri tíma.

Frétt af mbl.is

Segja viðræður um þriggja daga vopnahlé í gangi

Netanjahú vísar nú þeirri fjölmiðlaumfjöllunum á bug. Segist hann ekki ætla að semja um vopnahlé fyrr en Hamas-liðar hafa frelsað alla gísla sem þeir tóku í árás sinni þann 7. október, en þeir eru taldir vera um 240 talsins.

„Mig langar að sefa alls kyns falska orðróma sem við heyrum frá alls kyns áttum og ítreka eitt skýrt atriði: Það mun ekki vera neitt vopnahlé fyrr en gíslarnir eru lausir.“

Frétt af mbl.is

Útilokar vopnahlé nema gíslum verði sleppt

Hamas hafi misst stjórn í norðurhlutanum

Ísraelski herinn segir að Hamas-hryðjuverkasamtökin hafi misst stjórn á norðanverðri Gasaströndinni, þar sem um 50 þúsund Palestínumenn hafi þurft að flýja svæðið í dag.

Ísraelsher hefur skipað rýmingu á Gasasvæðinu – ýmist með símtölum, miðum sem fleygt hefur verið úr lofti og tilkynningum á samfélagsmiðlum, sem fáir Gasabúar hafa þó aðgang að sökum þess að ekkert net er á svæðinu. Herinn hefur jafnvel varað við því að norðanverðri Gasaströndinni verði breytt í „vígvöll“.