Erlent | AFP | 22.11.2023 | 7:00 | Uppfært 12:10

Vopnahlé samþykkt og 50 gíslum sleppt úr haldi

Benjamin Netanjahú, forsætisráðherra Ísraels. AFP/Brendan Smialowski

Ísraelar og Hamas-samtökin hafa tilkynnt að samningur hafi náðst um frelsun að minnsta kosti 50 gísla og tuga palestínskra fanga. Á sama tíma verður fjögurra daga vopnahlé gert á Gasasvæðinu.

Frétt af mbl.is

Leiðtogi Hamas segir vopnahlé í augsýn

Eftir margra vikna samningaviðræður, sem stjórnvöld í Katar stjórnuðu, samþykkti ríkisstjórn Benjamíns Netanjahú, forsætisráðherra Ísraels, vopnahlé í morgun eftir fundarhöld í nótt. Forsætisráðherrann sagði ráðherrum að þetta væri „erfið ákvörðun en rétt”.

Hamas-samtökin hafa sent frá sér yfirlýsingu þar sem þau segjast fagna „vopnahléi í mannúðarskyni”. Þar kemur einnig fram að 150 Palestínumönnum verður sleppt lausum úr ísraelskum fangelsum.

„Samkomulagið felur í sér lausn 50 kvenna og barna úr hópi almennra borgara sem eru í haldi á Gasasvæðinu í skiptum fyrir lausn fjölda palestínskra kvenna og barna sem eru í haldi í ísraelskum fangelsum. Fleirum verður sleppt á síðari stigum samkomulagsins,“ sagði í yfirlýsingu utanríkisráðuneytis Katars.

Reykur stígur upp eftir loftárás Ísraela á Gasasvæðinu. AFP/John MacDougall

Þann 7. október fóru byssumenn Hamas yfir landamærin að Ísrael og drápu um 1.200 manns, flesta almenna borgara, að sögn ísraelskra stjórnvalda. Árásin er sú versta í sögu Ísraels.

Hamas og aðrir herskáir hópar í Palestínu tóku um 240 gísla, bæði ísraelska og frá öðrum löndum. Á meðal þeirra voru börn og eldra fólk.

Ísraelar lýstu yfir stríði gegn Hamas. Þeir hétu því að ná gíslunum aftur heim og að stöðva Hamas í eitt skipti fyrir öll.

Umfangsmiklar loftárásir voru gerðar á Gasasvæðið og herlið var einnig sent á vettvang. Að sögn stjórnvalda Hamas á svæðinu hafa 14.100 manns farist, þar af þúsundir barna.