Erlent | mbl | 29.11.2023 | 23:45

Ætla að banna farsímanotkun í skólum

Luxon kynnti í dag 49 aðgerðir sem hann sagði að íhaldsstjórn hans hygðist taka á næstu þremur mánuðum. AFP/Martin Melville

Nýr forsætisráðherra Nýja-Sjálands, Christopher Luxon, er með á dagskrá sinni fyrir fyrstu 100 daga sína í embætti að banna farsímanotkun í skólum og að afnema ákveðnar tóbaksvarnir.

Luxon kynnti í dag 49 aðgerðir sem hann sagði að íhaldsstjórn hans hygðist taka á næstu þremur mánuðum. Fyrstu lögin sem nýja ríkisstjórnin mun reyna fá samþykkt í þinginu myndu þrengja umboð seðlabankans þannig að hann myndi eingöngu einbeita sér að því að halda verðbólgu í skefjum, sagði Luxon.

Núna er það þannig í Nýja-Sjálandi að hlutverk seðlabankans snýr einnig að því að reyna tryggja háa atvinnuþátttöku.

Telja að skólar hafi villst af leið

Stór hluti af þeim 49 aðgerðum sem ný ríkisstjórn mun taka á er hreinlega að afnema reglugerðir og lög sett á af síðustu ríkisstjórn. Þar má nefna tóbaksvarnir sérstaklega. Síðasta ríkisstjórn hafði samþykkt lög sem takmörkuðu níkótínmagn í sígarettum, bönnuðu fólki fætt eftir árið 2008 að geta keypt sér sígarettur þegar þau yrðu fullorðin og fleira. Ný ríkisstjórn hyggst afnema þessi lög.

Einni kynnti hann tvö átök í menntun. Annað þeirra krefst þess að skólar kenni að minnsta kosti klukkutíma í lestri, ritun og stærðfræði á hverjum degi.

Endurspeglar þetta viðhorf sumra kjósenda sem telja að skólar hafi villst af leið frá aðalhlutverki sínu. Hitt menntaátakið er bann við farsímanotkun í skólum.

ABC