Erlent | AFP | 20.12.2023 | 23:58 | Uppfært 21.12.2023 11:51

Biden segir Trump hafa stutt uppreisnina

Joe Biden Bandaríkjaforseti segir Donald Trump bersýnilega hafa stutt innrásina í Hvíta húsið árið 2021. AFP

Joe Biden, forseti Bandaríkjanna, segir Donald Trump bersýnilega hafa stutt atlöguna sem gerð var að þinghúsinu þar í landi í janúar árið 2021.

Biden lét ummæli sín í garð Trump falla í kjölfar þess að æðsti dómstóll Colorado-ríkis komst að þeirri niðurstöðu að Bandaríkjaforsetinn fyrrverandi mætti ekki taka þátt þar í forkosningum forsetakjörs sem hefjast á næsta ári.

Líklegur til að mæta Trump

„Ég leyfi dómstólnum að taka þessa ákvörðun,“ sagði Biden á blaðamannafundi í dag. „En hann studdi vissulega uppreisnina, það er engin spurning.“

Biden, sem atti kappi við Trump í forsetakosningunum árið 2020, segir það sjálfsagt að Trump fái ekki að bjóða sig fram í Colorado.

Hann er líklegur til þess að mæta Trump að nýju á næsta ári.

Frétt af mbl.is

Trump má ekki bjóða sig fram í Colorado

„Forseti sem hvetur til ofbeldis“

Ummæli Bidens þykja athyglisverð vestanhafs, en hann hefur örsjaldan tjáð sig opinberlega um þau fjölmörgu mál sem hrannast hafa upp gegn Trump að undanförnu.

Skoðanakannanir sýna fram á að mjótt sé á mununum milli keppinautanna tveggja og hefur Biden því gripið til þess að tjá sig frekar um atferli Trumps á opinberum vettvangi.

Í samtali við fjölmiðla sagði Biden að Trump væri helsta ógnin við lýðræði Bandaríkjanna. „Vegna þess að ef við töpum, töpum við öllu,“ er haft eftir honum í umfjöllun AFP.

„Þetta er fyrrverandi forseti sem í raun játar og hvetur til ofbeldis gegn sambræðrum sínum í Bandaríkjunum. Það er fyrirlitlegt.“