„Byssa sem er miðað að höfði Bandaríkjamanna“
Setja bókamerki
Háttsettir embættismenn frá bandarísku alríkislögreglunni (FBI), dómsmálaráðuneytinu og skrifstofu leyniþjónustustjóra héldu í gær lokaðan trúnaðarfund fyrir öldungadeildarþingmenn í leyniþjónustu- og viðskiptanefnd öldungadeildarinnar.
Í síðustu viku samþykkti fulltrúadeild Bandaríkjaþings frumvarp sem myndi þvinga móðurfyrirtækið Bytedance til að selja dótturfyrirtækið TikTok, ella yrði TikTok bannað í Bandaríkjunum.
Frumvarpið er nú til skoðunar hjá fyrrnefndum þingnefndum öldungadeildarinnar.
Vopnavæða upplýsingar og gögn
„TikTok er byssa sem er miðað að höfði Bandaríkjamanna,“ varaði Richard Blumenthal, öldungadeildarþingmaður Demókrata, við í kjölfar trúnaðarfundar í þinghúsinu.
„Kínversku kommúnistarnir eru að vopnvæða upplýsingar og gögn sem þeir eru stöðugt að safna frá 170 milljónum Bandaríkjamanna,“ sagði hann og útskýrði að upplýsingarnar væru svo hugsanlega notaðar til að hafa áhrif á umræðu um lýðræðisleg mál í Bandaríkjunum.
Segir TikTok ota efni um sjálfsskaða að börnum
Öldungadeildarþingmaðurinn Ted Cruz, fremsti Repúblikaninn í viðskiptanefndinni, sagði í kjölfar trúnaðarfundarins að það væri mikið áhyggjuefni hvernig TikTok beitir algrími (e. Algorithm) forritsins gegn notendum í Bandaríkjunum.
„Efnið á TikTok í Kína ýtir undir hluti eins og stærðfræði, vísindi, menntun, starfsþrek og aga. Og hér í Bandaríkjunum er kínverski kommúnistaflokkurinn að ýta undir efni til krakkanna okkar eins og sjálfsskaða og sjálfsvíg,“ sagði Cruz.
TikTok hafnar alfarið ásökunum
Þótt vísbendingar hafi verið uppi um að frumvarpið myndi eiga erfitt uppdráttar í öldungadeildinni þá virðast fleiri þingmenn nú vilja þvinga fram sölu TikTok. Margir þingmenn ítreka að ekki er verið að banna TikTok, heldur frekar að tryggja að fyrirtækið sé í eigu einstaklinga sem eru ekki með tengsl við kínverska kommúnistaflokkinn.
Ekki liggur fyrir hvenær frumvarp yrði sett á dagskrá öldungadeildarinnar en líklega verður það ekki alveg á næstunni þar sem tveggja vikna þinghlé hefst undir lok vikunnar.
TikTok hafnar alfarið ásökunum um að fyrirtækið hafi deilt með kínverskum stjórnvöldum gögnum um notendur. Kínversk stjórnvöld fordæmdu í síðustu viku samþykkt frumvarpsins í fulltrúadeild Bandaríkjaþings.
„Ef hægt er að taka geðþóttaákvörðun um að nota svokallaðar þjóðaröryggisástæður til að bæla niður framúrskarandi fyrirtæki frá öðrum löndum er hvorki sanngirni né réttlæti fyrir hendi,“ sagði Wang Wenbin, talsmaður utanríkisráðuneytis Kína, á blaðamannafundi fyrir viku.
Gosið gæti varað lengur: Meiri fyrirstaða í gosrásinni
Sáu eldgosið brjótast út frá Snæfellsnesi
Tekist á um áður óþekkta skýrslu landlæknis
Erlendir miðlar greina frá tíunda gosinu
Einar skorar á næstu ríkisstjórn
Beint: Eldgos hafið við Stóra-Skógfell
Á algjöru frumstigi eftir þrjár vikur af verkfalli