Erlent | AFP | 6.4.2024 | 23:09

Greta Thunberg handtekin tvisvar

Greta Thunberg var handtekin í Haag í dag. AFP/Ramon van Flymen

Sænski loftslagsaðgerðasinninn Greta Thunberg var handtekin tvisvar af hollensku lögreglunni í dag þegar hópur mótmælenda lokaði stofnbraut í Haag til þess að mótmæla jarðefnaeldsneytisstyrkjum.

Lögreglan greindi frá því að rúmlega 400 manns hefðu verið handteknir, þar á meðal voru tólf sem höfðu hvatt fólk til þess að loka götunni.

Thunberg, sem er 21 árs gömul, hefur verið látin laus úr haldi.

Thunberg var handtekin tvisvar. AFP/Ramon van Flymen

„Ofbeldi yrði beitt“

Mótmælendurnir gengu frá miðborg Haag að A12 hraðbrautinni sem tengir aðsetur hollensku ríkisstjórnarinnar við aðrar stórborgir á borð við Amsterdam, Rotterdam og Utrecht.

Kröfugangan var skipulögð af hópnum Extinction Rebellion (XR) sem hefur áður lokað hraðbrautinni í margar klukkustundir. Hefur lögregla áður gripið til þess ráðs að sprauta vatni á mótmælendur og fjarlægja þá.

Í dag kom lögregla hins vegar í veg fyrir að mótmælendur kæmust að stofnbrautinni og vöruðu við því að „ofbeldi yrði beitt“ ef þeir færu á götuna.

Koma í veg fyrir neyðarástand

Thunberg var á meðal þeirra sem kölluðu slagorð svo sem „hættið að styrkja jarðefnaeldsneytisnotkun“ og „plánetan okkar er að deyja“.

Thunberg sagði við AFP-fréttaveituna að það væri mikilvægt að mótmæla í dag vegna ástands plánetunnar.

„Við þurfum að gera allt til þess að koma í veg fyrir neyðarástand og bjarga mannslífum.“

Thunberg á meðal mótmælenda í dag. AFP/Ramon van Flymen

Settust niður

Thunberg, ásamt öðrum aðgerðarsinnum, komst að A12 hraðbrautinni og settist niður.

Spurð hvort hún hefði áhyggjur af handtöku svaraði Thunberg: „Afhverju ætti ég að vera það?“

Stuttu síðar var hún handtekin, ásamt öðrum, og dregin í burtu af lögreglu. Þeim var síðar sleppt á öðrum stað. Fljótlega voru þau þá aftur komin á sama stað og voru þá aftur handtekin. Thunberg var síðan látin laus.

Talsmaður saksóknara sagði AFP-fréttaveitunni að ekki væri búið að ákæra mótmælendurna.