„Kapall“ eigi vel við um Støre-stjórnina

Hadia Tajik, Anette Trette­bergstu­en, Anniken Huit­feldt og Ing­vild Kjerkol eru bara þeir ráðherr­ar rík­is­stjórn­ar Jonas­ar Gahr Støre, for­sæt­is­ráðherra Nor­egs, sem horfið hafa úr embætti vegna ein­hvers kon­ar hneykslis­mála þar sem ráðherr­ar hafa gerst sek­ir um brot sem telj­ast gegn góðri ráðsmennsku. Þá eru ótald­ir þeir sem skipt hef­ur verið út úr þess­ari tveggja og hálfs árs gömlu rík­is­stjórn.

Þegar allt er talið hef­ur hálf rík­is­stjórn for­sæt­is­ráðherra norska Verka­manna­flokks­ins horfið á braut síðan hún leit dags­ins ljós í kjöl­far síðustu stórþings­kosn­inga í Nor­egi. Engu að síður held­ur Støre því fram í viðtali við norska rík­is­út­varpið NRK að rík­is­stjórn hans hafi í engu veikst og eng­inn sé ómiss­andi.

Gerðist sek um ritstuld

Kven­ráðherr­arn­ir sem horfið hafa á braut hafa all­ir verið áber­andi í Verka­manna­flokkn­um og lyk­il­ráðherr­ar í stjórn­inni. Eins og mbl.is hef­ur fjallað um síðustu ár hætti Tajik eft­ir að upp komst um íbúðas­vindl af henn­ar hálfu, hún reynd­ist hafa leigt út íbúð sem hún hafði til umráða í sínu heima­kjör­dæmi og sofið heima hjá for­eldr­um sín­um þegar hún var þar á ferð.

Trette­bergstu­en reynd­ist hafa raðað vin­um sín­um í fjölda stjórna og nefnda þegar hún var menn­ing­ar- og jafn­ræðismálaráðherra, Huit­feldt ut­an­rík­is­ráðherra kvaðst ekk­ert hafa vitað um hluta­bréfa­kaup manns henn­ar sem meira og minna voru í fyr­ir­tækj­um, meðal ann­ars í her­gagnaiðnaði, sem norska stjórn­in var á leið í stór­samn­inga við en hafði ekki til­kynnt um þá op­in­ber­lega enn þá.

Og Kjerkol heil­brigðisráðherra sagði af sér í dag. Hvað gerði hún af sér? Gerðist sek um ritstuld í meist­ara­prófs­rit­gerð sem hún skrifaði með vin­konu sinni og sam­stúd­ent við Nord-há­skól­ann. Að þeirri niður­stöðu komst nefnd í mál­efn­um há­skóla­stúd­enta, Nemnda for stu­dentsa­ker, við Nord-skól­ann í gær.

Brotnaði sam­an í kveðjuræðu

Í dag til­kynnti Støre bros­andi í norsku kon­ungs­höll­inni í Ósló um þrjá nýja ráðherra í stjórn sinni, þau Jan Christian Vestre heil­brigðisráðherra, Cecilie Myr­seth viðskiptaráðherra og Mari­anne Si­vertsen Næss sjáv­ar­út­vegs­málaráðherra.

Støre þakkaði Kjerkol fyr­ir ein­stakt sam­starf en heil­brigðisráðherr­ann frá­far­andi var ekki viðstadd­ur í höll­inni, það síðasta sem norska þjóðin sá af henni var þegar hún brotnaði sam­an í kveðjuræðu á blaðamanna­fundi á föstu­dag­inn fyr­ir viku en Støre gaf ráðherr­an­um sem hann hafði ákveðið að sparka úr stjórn sinni aðeins hálfa klukku­stund til að semja ræðuna.

NRK skrif­ar í frétt sinni um brott­hvarf síðustu ráðherra að orðið „kap­all“ sem oft er notað um ráðherra­skip­an rík­is­stjórn­ar eigi sér­stak­lega vel við um nú­ver­andi rík­is­stjórn Verka­manna­flokks­ins sem hef­ur tekið stór­tæk­ari manna­breyt­ing­um á tveim­ur og hálfu ári en flest­ar aðrar stjórn­ir í sögu Nor­egs.

NRK

Netta­visen

TV2

• 1 blogg um frétt­ina

Bloggað um frétt­ina

• Wil­helm Em­ils­son: Ritþjóf­ar allra landa sam­ein­ist