Finnska flugfélagið Finnair hefur aflýst öllum fyrirhuguðum flugferðum til og frá eistnesku borginni Tartu næsta mánuðinn, sökum GPS-truflana sem raktar eru til rússneskra yfirvalda.

Tvær farþegaþotur á leið til Tartu á vegum félagsins þurftu að snúa aftur til Helsinki vegna GPS-truflana í síðustu viku.

Í yfirlýsingu frá flugfélaginu, sem gefin var út í dag, segir að beðið sé eftir að annarri aðflugslausn verði komið fyrir á flugvellinum, sem ekki þarf að reiða sig á GPS-staðsetningartæknina.

Eistneski utanríkisráðherrann Margus Tsahkna tjáði eistneska ríkisútvarpinu í dag að truflanirnar væru af völdum „algjörlega vísvitandi aðgerða“ af hálfu Rússa og að um væri að ræða árás í vissum skilningi.

Frétt af mbl.is

Trufluðu GPS-merki flugvélar varnarmálaráðherrans

Ráðherrar vara við truflunum

„Rússland veit mætavel að truflanir þess eru mjög hættulegar fyrir flugferðir okkar og ganga í bága við alþjóðasáttmála, sem Rússland á einnig aðild að,“ sagði Tsahkna.

Utanríkisráðherrar Eystrasaltsríkjanna vöruðu við því í gær, í viðtali við Financial Times, að víðtækar GPS-truflanir Rússa ykju hættuna á flugslysi. Bentu þeir á umræddar flugferðir Finnair sem snúa þurfti við í miðjum háloftunum.

Finnair er eina flugfélagið sem heldur úti alþjóðaflugi á flugvellinum.

„Flugöryggi er alltaf í efsta forgangi hjá okkur, og þar sem aðflugið í Tartu þarfnast GPS-sambands á þessari stundu þá getum við ekki flogið þangað þegar GPS-truflanir eru,“ var haft eftir Jari Paajanen, flugrekstrarstjóra Finnair.

Tengdar fréttir

Rússland

Segja Norður-Kóreumenn hafa haft lítil áhrif

• Norðurkóreskir hermenn drepnir í stríði Rússa
• Sammála um að koma þurfi á „varanlegum friði“
• Norðurkóreskir hermenn felldir í Evrópu
• Ákærður, fundinn sekur og myrtur

» Fleiri tengdar fréttir

• 1 blogg um fréttina

Bloggað um fréttina

• Guðmundur Jónsson: Truflanir á GPS