Fjölmennt lögreglulið er við öllu búið á lóð UCLA-háskólans í Kaliforníu í Bandaríkjunum en þeir hyggjast fjarlægja tjaldbúðir sem settar hafa verið upp við háskólann og reka mótmælendur á brott.
Efnt hefur verið til mótmæla á meðal háskólanema víðs vegar um Bandaríkin en mótmæli þeirra beinast gegn innrás Ísraelsmanna inn á Gasa og til stuðnings Palestínumönnum.
Til átaka hefur komið á milli lögreglunnar og mótmælenda við UCLA sem hafa kastað hlutum í átt að lögreglumönnum. Í það minnsta einn hefur verið handtekinn en lögreglan hefur ítrekað varað við því að mótmælendur verði handteknir yfirgefi þeir ekki tjaldbúðirnar.
Í gær handtók lögreglan í New York um 300 mótmælendur við Columbia- og CUNY-háskólana og þá voru 90 mótmælendur handteknir við Dartmount-háskólann.