Salome Zurabishvili, forseti Georgíu, hefur beitt neitunarvaldi sínu á umdeild fjölmiðlalög þar í landi. Lögin kveða á um að fjölmiðlar sem sækja meira en 20% fjármagns síns frá erlendu ríki, verði að skilgreina sig sem fjölmiðil sem starfar í þágu erlends ríkis.
Beiting neitunarvaldsins er sögð vera að mestu táknræn en stjórnarflokkurinn Georgíski draumurinn hefur á að skipa nægum fjölda þingmanna til að skjóta frumvarpinu framhjá neitunarvaldinu.
„Í dag beitti ég neitunarvaldi á lög sem eru í grunninn af rússnesku meiði og eru á skjön við stjórnarskrá okkar,“ sagði Zurabishvili í sjónvarpsávarpi.
Forsætisráðherra Georgíu Irakli Kobakhidze segir stjórnarflokkinn tilbúinn að endurskoða lögin út frá tillögum forsetans.