Donald Trump forsetaframbjóðandi flutti í nótt fyrstu ræðu sína opinberlega síðan að hann var skotinn í eyrað á laugardaginn. Fór hann um víðan völl í ræðu sinni. Hann talaði fyrir sameiningu í landinu, en gagnrýndi demókrata og núverandi forseta.

Lands­fund­ur re­públi­kana hef­ur staðið yfir frá því á mánu­dag en lauk í kvöld með ræðu Trumps í Milwaukee-borg í Bandaríkjunum.

Guð í liði repúblikana

Fjölmargir ræðumenn kvöldsins gáfu í skyn að það hefði verið Guð sem bjargaði honum frá byssuskotinu sem náði aðeins að skadda eyrað á Trump.

Trump svaraði þessu í ræðu sinni og sagði „Ég hafði Guð með mér í liði (e. I had God on my side)“

Forseti allra Bandaríkjanna

„Saman munum við hefja nýtt tímabil öryggis, velsældar og frelsis fyrir borgara af öllum kynþáttum, trúarbrögðum, litarhættum og trúarbrögðum,“ sagði Trump.

„Lækna verður þessar deilur og sundrungu í samfélagi okkar,“ sagði hann jafnframt.

„Ég er að bjóða mig fram til forseta fyrir öll Bandaríkin, ekki helming Bandaríkjanna,“ sagði Trump og bætti við að það yrði einungis hálfur sigur að vinna kosningarnar fyrir helming Bandaríkjamanna.

Gömul stef

Ekki leið á löngu þangað til Trump varð sjálfum sér samur og gagnrýndi harðlega demókrata í landinu og Joe Biden Bandaríkjaforseta. 

Þá rifjaði hann upp gamalt stef um að brögð hefðu verið í tafli í síðustu kosningum, sem hann tapaði fyrir Biden.

Allt frá ýkjum til haugalyga

CNN fréttastofan tók saman á þriðja tug skipta þar sem Trump er sagður fara með rangt mál í ræðu sinni. Í sumum tilvikum hafi hann ýkt sannleikann, en í öðrum sagt ósatt. 

Voru þar talin málefni líkt og efnahagsmál, innflytjendamál, utanríkisstefna Bandaríkjanna og þeim sem tengjast glæpum í landinu.

Trump hafi þá sagt að við síðustu forsetaskipti, þegar Biden tók við af Trump, hafi verið friður um allan heim. 

Demókratar hafi svindlað í síðustu kosningum, og að aldrei hafi verið eins mikil verðbólga í sögu Bandaríkjanna eins og undir stjórn Bidens.