Ræddu um hermennina frá Norður-Kóreu
Setja bókamerki
Volodimír Selenskí, forseti Úkraínu, ræddi við forseta Suður-Kóreu, Yoon Suk Yeol, um þátttöku Norður-Kóreu í stríðsrekstri Rússlands, í gegnum síma. Hann greinir frá símtalinu á Twitter.
Deildi Selenskí nýlegum gögnum með suðurkóreska starfsbróður sínum sem hann segir sýna flutning þrjú þúsund hermanna frá Norður-Kóreu á rússnesk æfingarsvæði skammt frá átakasvæðum.
Úkraínski forsetinn er nú staddur á Íslandi á þingi Norðurlandaráðs. Fundaði hann með Höllu Tómasdóttur, forseta Íslands, á Bessastöðum í morgun.
Áætla að tólf þúsund hermenn fari til Rússlands
Samkvæmt upplýsingum sem Pentagon er með undir höndum eru um tíu þúsund norðurkóreskir hermenn við þjálfun í Austur-Rússlandi.
Talið er að hermennirnir muni veita rússneskum hersveitum í Kúrsk-héraði í Rússlandi liðsinni í náinni framtíð.
Selenskí greinir frá því að áætlað sé að allt að tólf þúsund hermenn frá Norður-Kóreu fari til Rússlands.
Þakkaði fyrir stuðning
„Fyrst og fremst þakkaði ég honum fyrir óyggjandi stuðning Suður-Kóreu við fullveldi og landhelgi Úkraínu, jafnt sem fjárhags- og mannúðarstuðning sem ríkið hefur þegar veitt og heitið að veita,“ ritar Selenskí á Twitter um símtalið.
„Við ræddum þátttöku norðurkóreskra hersveita í innrásarstríði Rússa í Úkraínu. Niðurstaðan var skýr – þetta stríð er að alþjóðavæðast, það nær til fleiri en tveggja landa.“
Senda sendinefndir
Selenskí segir hann og suðurkóreska forsetann hafa sammælst um mikilvægi þess að styrkja skipti ríkjanna á njósnaupplýsingum og auka samskipti sín á milli til að þróa aðgerðaáætlun og mótvægisaðgerðir til að bregðast við stigmögnun stríðsins.
„Sem hluti af þessum samningi munu Úkraína og Suður-Kórea skiptast á sendinefndum til að samræma aðgerðir.“
Þá bauð Selenskí Suður-Kóreu til að skrifa undir tvíhliða öryggissamning sem var undirritaður á fundi G7-ríkjanna í Vilníus á síðasta ári.
Fullvissa ferðamenn um að hér sé öruggt
Hraun fór yfir Grindavíkurveg
Litlar líkur á að hraunið nái til mannvirkja
Myndir: Grindavíkurvegur aftur undir hraun
Úlfar: Heppileg tímasetning á gosinu
Hraunið náð Njarðvíkuræð: Fylgjast með raflínu
Hraunið við bílastæði Bláa lónsins
„Erum í miðri hrinu“: Styttist í Eldvörp