Aldrei vafi um skyldu vegna Icesave
Setja bókamerki
Percy Westerlund, sendiherra framkvæmdastjórnar Evrópusambandsins, segir að aldrei hafi leikið vafi á að íslenskum stjórnvöldum bar lagaleg skylda til að bæta innistæðueigendum í útibúum íslenskra banka á EES-svæðinu tap sitt. Ríkisstjórnin hafi formlega viðurkennt skyldur sína fyrir bankahrunið.
Westerlund vísar í pistli á bloggsíðu sinni til bréfa, sem gengu á milli íslenskra og breskra ráðuneyta í ágúst og október og segir að í bréfunum staðfesti íslenska ríkistjórnin að hún myndi bera ábyrgð ef tryggingasjóður innlána nægi ekki til að tryggja innlán. Evrópusambandið myndi án efa hafa haft sigur í dómsmáli en einnig sé augljóst, að langvinn málaferli hefðu hvorki verið nauðsynleg né gagnleg.
Þá hefðu íslensk stjórnvöld borið ábyrgð á bótum til erlendra Icesave-reikingseigenda hvernig sem tilskipun Evrópusambandsins sé túlkuð. Það sé vegna þess, að íslenska ríkisstjórnin tilkynnti að hún myndi tryggja innlán í íslenskum útibúum bankanna. Lítill vafi leiki á því, að þar með hafi ríkisstjórnin í raun tryggt erlendum viðskiptavinum bankanna það sama því ekki megi, samkvæmt EES-samningnum, mismuna íbúum á innri markaði EES.
