Svarar Kristjáni Þór fullum hálsi
Setja bókamerki
Björn Valur Gíslason, þingmaður VG og varaformaður fjárlaganefndar, svarar gagnrýni Kristjáni Þór Júlíussyni, þingmanni Sjálfstæðisflokksins, fullum hálsi á vef sínum í dag, en Kristján Þór gagnrýndi Björn Val harkalega í kvöldfréttum RÚV í gær fyrir að taka sér tveggja vikna leyfi frá þingstörfum til að fara á sjó. Á sama tíma sé verið að afgreiða aðildarumsókn að Evrópusambandinu og Icesave-málið.
Kleifabergið ekki skemmtiferðaskip heldur fiskiskip
„Kristján Þór Júlíusson Alþingismaður er pirraður vegna þess að ég þurfti að víkja af þingi um tíma og kalla inn varamann fyrir mig. Hann segist alveg gáttaður á því að ég hafi farið í frí út á sjó og nær væri fyrir mig að vera að gera það sem ég var kjörinn til að gera, þ.e. að sitja á Alþingi.
Það er rétt að leiðrétta Kristján Þór ef hann heldur að Kleifaberg ÓF-2 sé skemmtiferðaskip þangað sem menn fara á til að eiga gott frí. Kleifabergið er fiskiskip mannað harðsnúinni áhöfn sem hefur skilað miklum verðmætum í þjóðarbúið í gegnum árin, á sama tíma og Kristján Þór og hans félagar kafsigldu þjóðarskútuna í botnlausum skuldum.
Menn fara ekki umborð í Kleifabergið til að teygja úr sér og slappa af. En látum það liggja á milli hluta. Ég skal viðurkenna að það er ólíku saman að jafna þegar ég var kjörinn á þing í vor eða þegar Kristján Þór hlaut fyrst kosningu fyrir tveim árum.
Þá gat Kristján Þór leyft sér að sitja áfram í bæjarstjórn Akureyrar, reyndar sem forseti bæjarstjórnar á ágætum launum, samhliða þingstörfum. Því til viðbótar þáði hann ef ég man rétt u.þ.b. 7 milljónir króna af útsvarsgreiðendum á Akureyri í biðlaun eftir að hafa sjálfur sagt upp sem bæjarstjóri til þess að setjast á þing.
Ég samdi hinsvegar við mína ágætu útgerð um að skila af mér tveim veiðiferðum áður en ég færi í lengra leyfi frá störfum mínum á Kleifaberginu til að sitja á Alþingi. Ég fékk enginn biðlaun eins og Kristján Þór og ég þigg ekki laun á mörgum stöðum í einu eins og hann gerir/gerði.
Ég geri t.d. ekki ráð fyrir því að Kristján Þór hafi farið af launaskrá ríkisins á meðan hann gegndi störfum sínum sem forseti bæjarstjórnar á Akureyri og finnst líklegt að hann hafi það laun á báðum stöðum samtímis.Það er hans mál að gera grein fyrir því.
Það vill einfaldlega þannig til að við Kristján Þór komum úr ólíkum geira samfélagsins og höfum ólíkum skyldum að gegna gagnvart okkar fyrri vinnuveitendum. Þær skyldur axla ég óhikað hvað sem Kristján Þór kann að hafa við það að athuga. En ég skil það vel að hann sakni mín af Alþingi og vilji hafa mig þar sem lengst. Meirihluti kjósenda í kjördæmi okkar Kristjáns Þórs er honum sama sinnis hvað það varðar eins og kom svo skýrt fram í úrslitum kosninganna í vor," skrifar Björn Valur á vef sinn.
