"Uppstigningardagur geitunga" á næstunni

Geitungar eru farnir að sjást í ár, en þó í litlum mæli enn sem komið er, að sögn Erlings Ólafssonar, skordýrafræðings hjá Náttúrufræðistofnun Íslands. Erling kveðst bæði hafa séð geitunga sjálfur og þá hafi hann frétt frá fólki sem séð hefur þá á sveimi undanfarið. Hann viti hins vegar ekki til þess að nein geitungabú hafi fundist enn sem komið sé. "Það hefur sést til eins og eins geitungs frá í mars, eins og alltaf er," segir Erling. Hann segir að í maí komi venjulega einn almennur "uppstigningardagur geitunga" en þá verði skepnanna skyndilega vart í nokkrum mæli. Nokkuð breytilegt sé hvaða dag í maí þetta gerist. ".Það getur verið á bilinu 10.-25. maí, en stundum hefur þessi dagur haldist í hendur við kjördag," segir Erling. Vitað sé til þess að geitungar hafi farið að láta sjá sig á kjördag í forsetakosningum sem og í þingkosningum á fyrri árum. Þar sem ekki verður kosið til sveitarstjórna fyrr en 27. maí næstkomandi telur Erling þó líklegast að þá verði geitungarnir þegar komnir fram.

Gætu komið vel undan vetri

Ekki var mikið um svonefnda holugeitunga á landinu í fyrra, en að sögn Erlings á sú geitungategund það til að vera heldur uppstökk. Stofn holugeitunga hafi hrunið í hittiðfyrra. Skýringin á því liggi ekki fyrir en ágiskanir séu uppi um að hrunið hafi átt sér stað vegna hitasveiflna. Erling segir ekki hægt að spá til um hvort mikið verði af geitungi í sumar. "Þótt lítið hafi verið af holugeitungi í fyrrasumar gætu þeir samt komið vel undan vetri og verið þokkalegt ástand á þeim í sumar," segir hann. Íslendingar þurfi að fara að venjast geitungum sem séu komnir hingað til að vera. "Á það þarf að læra á það og við erum smám saman að því," segir Erling. Venjulega séu geitungar sýnilegastir seinni hluta ágústmánaðar. "Þá er farin að koma lausung á þá og fjöldinn í búunum kominn í hámark," segir Erling Ólafsson.