Mótmælendur tóku yfir verkfræðistofu á Reyðarfirði

Um átta til tíu mótmælendur Kárahnjúkavirkjunar höfðu uppi mótmæli á skrifstofu verkfræðistofunnar Hönnunar á Reyðarfirði um klukkan níu í morgun. „Þeir settu stóla fyrir dyr og fleyga undir hurðir svo að fólk komst hvorki út né inn," sagði Steinar Ómarsson vélatæknifræðingur í samtali við Fréttavef Morgunblaðsins. Mótmælendur voru allir útlendingar en þegar þeim tókst ekki að loka sig inni á skrifstofu yfirmanns og varð ljóst að búið var að kalla til lögreglu fóru þeir á brott.

„Þetta var stutt yfirtaka á húsnæðinu og púðrið fór fljótt úr mótmælunum og þeir yfirgáfu staðinn fljótlega," sagði Steinar en hann taldi að mótmælin hafi staðið í tuttugu mínútur eða svo.

Steinar sagði að litlu hefði mátt muna að mótmælendum hefði tekist að loka sig inni á skrifstofu yfirmanns og að þá hefði umsátrið trúlegast varað lengur. „Þeir læddust inn á skrifstofuna en við settum öxlina í hurðina á síðustu stundu," sagði Steinar. Um sex til sjö starfsmenn Hönnunar voru á staðnum í morgun en skrifstofan á Reyðarfirði mun lítið sem ekkert koma nálægt hönnun Kárahnjúkavirkjunar. „Við erum með almenna starfsemi og þjónum Fjarðarbyggð og nágrenni," sagði Steinar að lokum.

• 1 blogg um fréttina

Bloggað um fréttina

• Björn Sighvatsson: Verkfræðingar með áhættubónus?