Götuljós slökkt á höfuðborgarsvæðinu

Slökkt var á götuljósum í öllum sveitarfélögum frá Reykjanesi og upp á Akranes, á Suðurnesjum, í Dalvíkurbyggð, Borgarbyggð og Fljótsdalshéraði milli klukkan 22 og 22.30 í kvöld, í tengslum við upphaf Alþjóðlegrar kvikmyndahátíðar í Reykjavík. Andri Snær Magnason rithöfundur átti hugmyndina að myrkvuninni og lítur á hana sem stóran gjörning, en ljósmengun kemur alla jafna í veg fyrir að fólk sem býr í þéttbýli geti barið augum stjörnur himinsins og norðurljós. Lítið sást þó til stjarna á mestöllu höfuðborgarsvæðinu vegna skýja en mikil ró og fegurð færðist yfir borgina og fallegar skuggamyndir urðu til.