Fékk ellefu símtöl á klukkustund

eftir Andra Karl

andri@mbl.is

FIMMTÁN ára stúlka vissi vart hvaðan á sig stóð veðrið þegar ókunnugir karlmenn hófu að hringja í hana nú nýverið, með alls kyns óhugnanleg tilboð. Bekkjarfélagi stúlkunnar hafði þá sett persónuupplýsingar og símanúmer hennar á íslenskan einkamálavef.

Pilturinn bjó til einkamálaauglýsingu fyrir hönd stúlkunnar, án hennar vitundar, á skólatíma og svaraði morguninn eftir þeim skilaboðum sem borist höfðu - 11-13 skilaboð. Gaf hann þá m.a. upp símanúmer stúlkunnar og viðbrögðin létu ekki á sér standa. Á einni klukkustund bárust stúlkunni símtöl frá ellefu karlmönnum og um hádegisbil voru 58 svör komin við auglýsingunni.

Í millitíðinni komst upp um málið og var vefstjóra einkamálavefjarins gert að fjarlægja auglýsinguna. Í kjölfarið funduðu skólastjórnendur með öllum aðilum málsins en óvíst er enn hvort foreldrar stúlkunnar munu kæra athæfið.

Ein tegund eineltis

Sífellt færist í vöxt að nemendur í grunnskóla hrelli skólasystkin sín með hjálp netsins, og virðist sem yngri nemendur séu fljótir að tileinka sér slíka siði. Skólastjóri sem Morgunblaðið ræddi við sagðist þekkja dæmi um einelti af þessu tagi alveg niður í fjórða bekk. Hann segir mörg börn ekki nægilega vel upplýst um hætturnar sem leynast á netinu og oft vanti kærleika og virðingu fyrir öðru fólki. Jafnframt telur hann mikilvægt að lyfta umræðunni um þessi mál hærra og fá foreldra til að taka virkari þátt, ná sambandi við börnin og finna út hvað þau séu að gera á netinu.

Með ódýrum myndavélasímum og bloggvefjum virðist auðvelt að níða einstaklinga, og oft erfitt að hafa hendur í hári þeirra sem leggja slíkt í vana. Ábyrgð foreldra er mikil og á vefsvæði SAFT - Samfélag, fjölskylda og tækni er að finna margvíslegar upplýsingar fyrir foreldra um örugga net- og farsímanotkun barna og unglinga.