Innlent | mbl | 15.12.2006 | 12:12 | Uppfært 18:44

Bloggsíðan Orðið á götunni í tímabundið frí

Ritstjórn bloggsíðunnar Orðið á götunni hefur ákveðið að fara í tímabundið frí frá skrifum á síðuna, samkvæmt því sem þar kemur fram. Orðið á götunni er önnur vinsæla íslenska bloggsíðan sem tilkynnir um hlé frá skrifum á undanförnum dögum en skammt er síðan Hrafn Jökulsson, tilkynnti á bloggsíðu sinni að hann væri að hætta tímabundið að skrifa blogg.

Greint var frá því á mbl.is fyrir skömmu að fjöldi virkra bloggsíðna í heiminum muni sennilega ná hámarki um mitt næsta ár og að þá verði reknar 100 milljónir virkra bloggsíðna í netheimum.

Á bloggsíðunni Orðið á götunni segir m.a: „Þeim sem lesið hafa þessa síðu reglulega eiga þrátt fyrir þetta tæplega eftir að finna fyrir skorti á áhugaverðum bloggfréttum um stjórnmál, viðskipti og því sem fólk er að tala um. Framboðið af slíku er yfirdrifið nóg um þessar mundir.
Ólíkt því sem var þegar Orðinu á götunni var hleypt af stokkunum í byrjun júní síðastliðnum er nú hægt að velja milli fjölmargra góðra bloggsíðna þar sem fjallað er óstaðfestar fréttir, orðróm og lesið á milli línanna í fréttum hefðbundinna fjölmiðla. Það er mjög góð þróun og stuðlar að öflugri þjóðfélagsumræðu.
Mikið af því sem áður var aðeins rætt á göngum og í hinum frægu reykfylltu bakherbergjum er nú um leið komið út á netið og því er orðið erfiðara en áður fyrir menn að reyna að stýra umræðunni í þann farveg sem þeir kjósa. Hún öðlast þvert á móti sjálfstætt líf. Stjórnmálamenn og forystumenn í viðskiptalífi hafa ekki lengur efni á tjá sig ekki um erfið mál og hið sígilda áhyggjuefni um að hægt sé að misnota völd yfir fjölmiðlum er ekki jafn aðkallandi."