Íslenskur flugdólgur á leið frá Kúbu skilinn eftir í Halifax

Íslenskur karlmaður sem tók að láta ófriðlega um borð í flugvél Heimsferða á leið til Íslands frá Kúbu í gær var skilinn eftir ásamt konu sinni í Halifax í Kanada, þar sem vélinni var millilent til að taka eldsneyti.

Að sögn annarra farþega í fluginu voru maðurinn og kona hans alldrukkin og vel birg af áfengi í fluginu. Þegar líða tók að millilendingu í Halifax gerðist maðurinn æstur og hóf að sýna flugfreyjum dónaskap og ónáða samferðamenn, sem vildu fá sig flutta í hæfilega fjarlægð frá manninum.

Kona hans reyndi að róa hann, en þá brá svo við að maðurinn barði hana að flugþjónum ásjáandi. Flugstjórinn sem tók við vélinni í Halifax, Peter Gantzholm, þverneitaði að flytja manninn áfram til Íslands og voru hjónin því skilin eftir.

Flugþjónar um borð í vél Heimsferða vildu koma því á framfæri, í samtali við mbl.is, að einungis mætti neyta þess áfengis sem á boðstólum sé í vélunum, en farþegum sé bannað að neyta áfengis sem þeir flytja með sér. Einnig vildu þeir taka fram að framkoma annarra farþega hafi verið með miklum sóma.

• 1 blogg um fréttina

Bloggað um fréttina

• HKS: Slæmir timburmenn