Innlent | mbl | 29.12.2006 | 17:13

Á þriðja tug flugumferðarstjóra hafa ráðið sig til Flugstoða

Ragnhildur Hjaltadóttir, ráðuneytisstjóri samgönguráðuneytis, Baldur Guðlaugsson, ráðuneytisstjóri fjármálaráðuneytis, Sturla Böðvarsson samgönguráðherra, Ólafur Sveinsson, stjórnarformaður Flugstoða ohf., og Þorgeir Pálsson, verðandi forstjóri Flugstoða, við undirritun samningsins í dag.

Hátt í þrjátíu flugumferðarstjórar hafa nú ráðið sig til starfa hjá Flugstoðum, sem hefur rekstur á miðnætti 1. janúar næstkomandi, samkvæmt upplýsingum Hjördísar Guðmundsdóttur, upplýsinga- og kynningarfulltrúi Flugmálastjórnar Íslands, en skrifað var undir þjónustusamning samgönguráðuneytisins og Flugstoða, um þjónustu á sviði flugvallarekstrar og flugumferðarþjónustu í dag.

Þá segir hún að þeir flugumferðarstjórar sem hafi ráðið sig til starfa hjá Flugstoðum hafi margir áratuga reynslu af flugumferðarstjórn. Þá hafi sumir þeirra verið í endurþjálfun að undanförnu sem miði að því að virkja réttindi þeirra.

Eins og fram hefur komið í fjölmiðlum munu flugumferðarstjórar vinna eftir sérstakri viðbragðsáætlun í nánu samstarfi við nærliggjandi flugstjórnarmiðstöðvar á meðan ekki hefur verið ráðið í allar stöður þeirra. Fram kemur í yfirlýsingu Flugmálastjórnar Íslands að markmið viðbragðsáætlunarinnar sé að tryggja flugöryggi á flugstjórnarsvæðinu og sjá til þess að sem minnst röskun verði á millilanda- og innanlandsflugi, þótt hugsanlega verði um tímabundinn skort á flugumferðarstjórum að ræða í flugstjórnarmiðstöðinni í Reykjavík.

Viðbúnaðaráætlunin felur í sér breytingu á skipulagi flugumferðar á íslenska flugstjórnarsvæðinu sem mun að mestu leyti fylgja föstum fyrirfram ákveðnum ferlum og flughæðum. Innanlandsflugið mun á sama hátt fylgja föstum ferlum í leiðarflugi á milli flugvalla.