Ríkið og Akureyri gera samstarfssamning um menningarmál

Þorgerður Katrín Gunnarsdóttir, menntamálaráðherra, og Kristján Þór Júlíusson, bæjarstjóri á Akureyri, undirrituðu í dag þriggja ára samning um samstarf menntamálaráðuneytis og Akureyrarbæjar um menningarmál í Akureyrarbæ.

Samningurinn hljóðar upp á samtals 360 milljóna króna framlag ríkisins og gildir til ársloka 2009. Fyrsti samningurinn um framlög ríkisins til menningarmála er tengjast Akureyrarbæ var undirritaður árið 1996 og hefur verið endurnýjaður reglulega síðan.

Að sögn menntamálaráðuneytisins er markmið samningsins að efla enn frekar hlutverk Akureyrar í lista- og menningarlífi á Íslandi. Með stuðningi við meginstofnanir á sviði myndlistar, tónlistar og leiklistar vilji samningsaðilar stuðla að því að Akureyri verði þungamiðja öflugs menningarstarfs, með möguleikum til aukinnar atvinnumennsku á listasviði. Á samningstímanum verður tekið í notkun nýtt menningarhús sem lýtur að sömu markmiðum.

Samningsaðilar eru sammála um að meginverkefni samningsins séu að efla starf Sinfóníuhljómsveitar Norðurlands, að styrkja starf Listasafnsins á Akureyri sem meginstoðar myndlistar utan höfuðborgarsvæðisins, að renna enn styrkari stoðum undir starfsemi atvinnuleikhúss á Akureyri, að Amtsbókasafnið geti gegnt hlutverki sínu sem eitt af skylduskilasöfnum í landinu, og að kynna fornleifaverkefnið að Gásum og miðla þeirri þekkingu sem til hefur orðið.

• 1 blogg um fréttina

Bloggað um fréttina

• Stefán Friðrik Stefánsson: Nýr menningarsamningur undirritaður á Akureyri