Flokksráðsfundi VG í Reykjavík lokið

Flokksráðsfundi Vinstri grænna í Reykjavík lauk í dag, fundurinn einkenndist af málefnavinnu fyrir komandi kosningar, en fjórar ályktanir voru samþykktar á fundinum. Í ályktunum flokksins segir m.a. að flokkurinn telji óviðunandi ekki hafi verið brugðist fyrr við ásökunum á hendur fyrrum forstöðumanni Byrgisins, sem fram komu í nóvember á síðasta ári. Þá leggst flokkurinn gegn frekari stóriðju- og virkjanaframkvæmdum.

Í ályktun um málefni Byrgisins segir að flokkurinn telji óviðunandi að Ríkissaksóknari og Sýslumannsembættið á Selfossi hafi ekki brugðist þegar í stað við þeim ásökunum sem komu fram í sjónvarpsþætti í nóvember 2006, gegn fyrrverandi forstöðumanni Byrgisins um meint kynferðis-samband hans við skjólstæðinga þess. Segir í ályktuninni að viðbrögðin veki furðu, ekki síst í ljósi þess að stjórnvöld brugðust tafarlaust við ásökunum um fjármálamisferli.

Þá er fjallað um fyrirhugaðar stóriðju- og virkjanaframkvæmdir og segir í ályktun flokksins að ljóst sé að afdrifaríkar ákvarðanir á þessu sviði geti ekki verið einkamál einstakra sveitarfélaga. Flokksráðsfundur Vinstrihreyfingarinnar - græns framboðs telur engan veginn nægjanlegt að láta aðeins kjósa um afmarkaða skipulagsþætti s.s. deiliskipulag lands í einstaka sveitarfélögum eins og nú stendur til í Hafnarfirði vegna álbræðslunnar í Straumsvík.

Lagst er gegn fyrirhugaðri stækkun álbræðslunnar í Straumsvík, áformum um byggingu álbræðslu í Helguvík og við Húsavík, virkjana í neðrihluta Þjórsár, Jökulsánna í Skagafirði, jarðvarmavirkjana á Reykjanesskaga, Hengilsvæðinu og Þingeyjarsýslum.

Vinstri græn lýsa einnig furðu sinni á því andvaraleysi sem „ríkt hafi af hálfu hins opinbera undanfarin ár um hag stórs hóps vímuefnaneytenda og geðsjúkra og minni á samfélagslega ábyrgð í því efni.”

Í fjórðu ályktuninni fagnar flokksráðsfundur Vinstrihreyfingarinnar græns framboðs, haldinn því að kona hafi í fyrsta skipti boðið sig fram til formennsku í Knattspyrnusambandi Íslands. Segir i ályktuninni að knattspyrna hafi fram til þessa verið eitt helsta vígi karlmennskunnar og að innan knattspyrnusambandsins hafi ríkt „óviðunandi misrétti milli karla og kvenna”.

• 1 blogg um fréttina

Bloggað um fréttina

• Snorri Bergz: Sigur að bjóða sig fram?