VG: Engin þverpólitísk samstaða liggur fyrir í bæjarstjórn Hafnarfjarðar

Ekki liggur fyrir þverpólitísk samstaða í bæjarstjórn Hafnarfjarðar um stækkun álbræðslunnar í Straumsvík. VG í Hafnarfirði mótmælir harðlega yfirlýsingu bæjarstjóra Hafnarfjarðar þar að lútandi, segir í tilkynningu frá bæjarstjórnarflokki og stjórn Vinstri grænna í Hafnarfirði.

Þar segir ennfremur: „Hið sanna í málinu er að fulltrúar VG hafa ásamt fulltrúum allra stjórnmálaflokka sem fulltrúa eiga í bæjarstjórn Hafnarfjarðar, komið að skipulagsvinnu sem m.a. lýtur að starfs- og mengunarskilyrðum stóriðju innan bæjarmarkanna. VG hefur hins vegar tekið afdráttarlausa afstöðu gegn stækkun álbræðslunnar í Straumsvík. Þessi afstaða hefur ítrekað komið fram af hálfu fulltrúa VG innan bæjarstjórnar Hafnarfjarðar og annars staðar á opinberum vettvangi.

Þetta er bæjarstjóra Hafnarfjarðar fullkunnugt um. Fréttaflutningur í dag 24.janúar á rætur að rekja til fréttamannafundar sem efnt var til í dag þar sem bæjarstjóri tekur þá afstöðu að rangtúlka álit starfshóps skipulags og byggingaráðs Hafnarfjarðar um hugsanlega stækkun álbræðslunnar, Alcan og stóriðjustefnu ríkisstjórnarinnar í hag.

Bæjarstjórinn setur samasemmerki á milli deiliskipulagsvinnu annars vegar og fylgispektar við stækkun álbræðslunnar hins vegar. Það sýnir hve fráleit þessi tenging er í kosningum um stækkunina. Afstaða VG hefur verið og er að kjósendur eigi að standa frammi fyrir skýrum valkostum um þetta mikilvæga mál og kjósa um stækkun álbræðslunnar en ekki deiliskipulag.“

• 3 blogg um fréttina

Bloggað um fréttina

• Dofri Hermannsson: Ósköp er vandlifað!
• Birgitta Jónsdóttir: Ég var einmitt svo hissa á þessu orðalagi í fréttum
• Rauða Ljónið: Undarlegur viðsnúningur Vinstri Græna í Hafnarfirði .