Um 20 úrsagnir úr Frjálslynda flokknum

Eftir Elvu Björk Sverrisdóttur elva@mbl.is
Um tuttugu úrsagnir úr Frjálslynda flokknum bárust skrifstofu flokksins í gærdag, að sögn Magnúsar Reynis Guðmundssonar, framkvæmdastjóra flokksins. Magnús sagði í samtali við Morgunblaðið í gær að á sama tíma hefðu sex manns gengið í flokkinn „þannig að það eru engar sviptingar", sagði Magnús.

Guðjón Arnar Kristjánsson, formaður Frjálslynda flokksins, segist ekki líta svo á að flokkurinn sé klofinn þrátt fyrir að Margrét Sverrisdóttir hafi sagt skilið við hann. Hann reikni þó allt eins með að úrsögnum úr flokknum eigi eftir að fjölga. Ekki sé enn víst hvernig stuðningsmenn Margrétar bregðist við brotthvarfi hennar. Vissulega missi flokkurinn eitthvað af stuðningsfólki en einnig muni bætast í hann. Guðjón Arnar bendir á að flokkurinn hafi ekki klofnað þegar Gunnar Örlygsson, fyrrum þingmaður Frjálslyndra, gekk til liðs við Sjálfstæðisflokkinn árið 2005, þótt þá hafi farið fólk úr flokknum.

Sigurlín Margrét Sigurðardóttir, varaþingmaður Frjálslynda flokksins í Suðvesturkjördæmi, er ein þeirra sem hafa sagt sig úr flokknum, en Sigurlín var varamaður Gunnars Örlygssonar. Guðjón Arnar segist ekki sjá annað en að hún haldi því umboði sem hún hafði sem slíkur. Þá hefur borgarstjórnarflokkur Frjálslyndra lýst stuðningi við Margréti og segir Guðjón Arnar að það eigi eftir að koma í ljós hvar sá stuðningur liggi og hvort þeir sem eru í borgarstjórnarflokknum segi sig úr flokknum.

Margir viljað ræða málin

Margrét Sverrisdóttir segist ekki hafa tekið ákvörðun um framhaldið hjá sér. Koma muni í ljós á næstunni hversu margir stuðningsmenn hennar vilji fylgja henni og hve margir kjósi að starfa áfram innan Frjálslynda flokksins. Hún segist ekki vera farin að undirbúa sérframboð. Margt fólk hafi haft samband við sig með vangaveltur um framhaldið í huga. Margrét bætir við að hún vilji stíga varlega til jarðar og hafa náið samráð við samherja.