Andri Snær og Ólafur Jóhann hlutu Íslensku bókmenntaverðlaunin

Andri Snær Magnason og Ólafur Jóhann Ólafsson hlutu í dag Íslensku bókmenntaverðlaunin. Andri Snær fékk verðlaun í flokki fræðirita fyrir Draumalandið, og Ólafur Jóhann í flokki skáldrita fyrir Aldingarðinn. Forseti Íslands, Ólafur Ragnar Grímsson, afhenti verðlaunin á Bessastöðum síðdegis í dag.

Í flokki vísindarita og rita almenns efnis voru þessar bækur tilnefndar:

Draumalandið eftir Andra Snæ Magnason, Íslenskir hellar eftir Björn Hróarsson, Óvinir ríkisins eftir Guðna Th. Jóhannesson, Skáldalíf eftir Halldór Guðmundsson og Upp á Sigurhæðir eftir Þórunni Valdimarsdóttur.

Í flokki fagurbókmennta voru þessar tilnefndar:

Tryggðarpantur eftir Auði Jónsdóttur, Sendiherrann eftir Braga Ólafsson, Fyrir kvölddyrum eftir Hannes Pétursson, Guðlausir menn eftir Ingunni Snædal, og Aldingarðurinn eftir Ólaf Jóhann Ólafsson.

Í dómnefnd sátu Stefán Baldursson, Sigríður Þorgeirsdóttir og Kristján Kristjánsson.