Innlent | mbl | 20.2.2007 | 9:35

Ekkert einbýlishús til sölu á Blönduósi

Stefán Hólm, sem er í þann mund að fara austur yfir Blöndu á brúnni, þarf ekki að leita að húsnæði á Blönduósi því húsaskjól á hann fyrir. mbl.is/Jón Sigurðsson

Magnús Ólafsson, sölumaður fasteigna hjá Lögmannsstofu Stefáns Ólafssonar á Blönduósi segir að gærdagurinn, mánudagurinn 19. febrúar, hefði verið sögulegur að því leyti, að þetta væri í fyrsta skipti í 10 ára sögu fasteignasölunar að ekkert íbúðarhús væri til sölu á Blönduósi.

Það hefur verið afar erfitt að fá keypt íbúðarhús á Blönduósi undanfarin misseri og nú er svo komið að ekkert er til sölu, að sögn Magnúsar.

Það er því tímabært að trésmiðjan Stígandi er að byggja parhús við Smárabraut 6-8 en það munu vera um 17 ár síðan síðast var reist íbúðarhús í þéttbýli Blönduóss.