Innlent | mbl | 22.2.2007 | 11:50 | Uppfært 16:27

Jón Gerald játar bókhaldsbrot

Jón Gerald Sullenberger var yfirheyrður í Héraðsdómi Reykjavíkur í morgun. Tryggvi Jónsson var einnig mættur með lögmanni sínum og hlýddi á vitnisburð Jóns Geralds sem lýsti nákvæmlega upphafi viðskipta sinna við Baugsfeðga og hvernig síðan slitnaði upp úr samstarfinu.

Jón Gerald er ákærður með Jóni Ásgeiri Jóhannssyni og Tryggva Jónssyni og er honum gefið að sök að hafa aðstoðað við að rangfæra bókhald Baugs og gefið út tilhæfulausan reikning upp á 589 þúsund Bandaríkjadali.

Jón Gerald sagðist kannast við að hafa útbúið þennan reikning og gert það samkvæmt fyrirmælum frá Tryggva Jónssyni sem sagði honum hvað ætti að standa á honum. Jón Gerald staðfesti að það hefðu ekki verið nein viðskipti á bakvið þennan reikning og sagði að hann hefði verið alveg út í loftið.

Jón Gerald sagði einnig að hann hefði heyrt haft eftir einum lögmannanna sem vinna að þessu máli að vinslit hans við Baugsmenn væru tilkomin vegna kvennamála. „Í þessu felst mikil kvenfyrirlitning,” sagði Jón Gerald og fór fram á að ónefndur lögmaður bæði konu sína til 20 ára, sem hann ætti tvo drengi með, afsökunar þegar hún kæmi fyrir réttinn sem vitni.

Jón Gerald lýsti síðan í smáatriðum viðskiptum sínum við Baug og sagðist hann hafa fengið sig fullsaddan á vanefndum viðskiptaloforðum og síðan sauð endanlega upp úr að hans sögn þegar Jón Ásgeir vanvirti það traust sem hafði ríkt á milli þeirra þegar hann frétti af því að Jón Ásgeir hefði farið á fjörurnar við eiginkonu hans í einkasamkvæmi í Reykjavík.

Síðan lýsti Jón Gerald því hvernig hann bar sig að því að verða sér út um lögmann á Íslandi til að leita réttar síns gagnvart Baugi.

Í vitnisburði sínum talaði Jón Gerald oft um Jón Ásgeir sem „drenginn" og þurfti ítrekað að útskýra að með því átti hann við Jón Ásgeir Jóhannesson.