Ökumenn hægja á í umferðinni

Fjörutíu og einn ökumaður var tekinn fyrir hraðakstur á síðasta sólarhring á höfuðborgarsvæðinu en akstur þeirra var þó ekkert í líkingu við það sem sást um helgina. Grófustu brotin voru framin á Sæbraut en þar voru fjórir ökumenn teknir á yfir 100 km hraða.

Einn þeirra á yfir höfði sér ökuleyfissviptingu í einn mánuð og 75 þúsund króna sekt. Hinir þrír mega búast við 60 þúsund króna sekt hver. Tveir ökumenn, karlmaður og kona á miðjum aldri, voru teknir fyrir ölvunarakstur í gær.

Þrettán umferðaróhöpp voru tilkynnt til lögreglunnar á höfuðborgarsvæðinu í gær. Það er með allra minnsta móti enda gekk umferðin alveg bærilega fyrir sig með örfáum undantekningum.

Bíll hafnaði á ljósastaur í Lönguhlíð í gærmorgun og var ökumaðurinn, karlmaður á fimmtugsaldri, fluttur á slysadeild.

Í hádeginu var keyrt á tæplega þrítuga konu á Sundlaugarvegi. Hún kenndi sér ekki meins fyrr en nokkru eftir óhappið og fór þá sjálf á slysadeild.

• 1 blogg um fréttina

Bloggað um fréttina

• Birgir Þór Bragason: Þetta er að skila árangri