Leiddist búðarferðirnar og fór heim

Drengur á sjötta aldursári var síðdegis í gær á ferð með móður sinni í Reykjavík og þurfti móðirin m.a. að bregða sér í búð til að kaupa í matinn. Á meðan átti drengurinn að bíða í bíl þeirra mæðgina.

Að sögn lögreglunnar virðist drengnum eitthvað hafa leiðst biðin því hann var horfinn þegar móðirin sneri aftur í bílinn. Lögreglan var þá kvödd til og fór hún að svipast um eftir drengnum. Hann var hvergi sjáanlegur og var þá farið að heimili hans, talsverðan spöl. Þar var drengurinn í makindum og urðu að vonum fagnaðarfundir þegar móðirin kom heim aftur.

Lögreglan segir, að sagt sé að karlmenn séu lítið gefnir fyrir búðaráp og drengurinn sé greinilega engin undantekning.

• 1 blogg um fréttina

Bloggað um fréttina

• Sverrir Þorleifsson: Þessar mömmur!!