Innlent | mbl | 16.3.2007 | 7:40

Braut gegn sjö stúlkubörnum

Héraðsdómur Vesturlands hefur dæmt karlmann í 12 mánaða fangelsi, þar af 9 mánuði skilorðsbundið, fyrir að þukla utanklæða á sjö stúlkum á aldrinum 6 til 9 ára. Voru brotin framin frá því í júní og fram á haust á síðasta ári.

Brotin gegn sex af stúlkunum voru framin í heitum potti við sundlaug en brotið gegn yngstu stúlkunni var framið á heimili mannsins. Auk fangelsisrefsingarinnar var maðurinn dæmdur til að greiða sex stúlkum 200 þúsund krónur hverri og þeirri yngstu 300 þúsund krónur.

Dómurinn segir í niðurstöðu sinni, að maðurinn hafi gengist við brotunum og hafi leitað sér aðstoðar hjá sálfræðingi og á geðdeild Landspítalans. Vísað er í bréf frá sálfræðingi þar sem segir, að maðurinn hafi sýnt ríkan vilja til að taka á sínum vanda auk þess sem hann hafi verið fullur iðrunar vegna þeirra brotanna.

Hins vegar verði að horfa til þess, að brotin hafi beinst gegn sjö ungum börnum, sex stúlkum þegar þær voru að leik í sundi, og hins vegar gagnvart einu stúlkubarni sem var gestkomandi á heimili ákærða. Þá liggi fyrir að börnin hafa liðið fyrir brotin og megi gera ráð fyrir að þau geti valdið börnunum vanlíðan síðar meir þegar þau eldast og þroskast.