Reykjavíkurborg stefnir að því að greiða niður langtímaskuldir

Samkvæmt þriggja ára áætlun Reykjavíkurborgar er miðað við, að skatttekjur, þjónustutekjur og fjármunatekjur frá dótturfélögum standi undir rekstri Aðalsjóðs og langtímaskuldir verði greiddar niður á tímabilinu. Miðað er við, að íbúar Reykjavíkurborgar verði orðnir 121.734 talsins árið 2010.

Árið 2007 er áætlað að 14 milljarða króna afgangur verði af rekstri A hluta Reykjavíkurborgar. Auk sölu á hlut borgarinnar í Landsvirkjun, skýrist afgangurinn af sölu eigna og byggingaréttar í Eignasjóði og Skipulagssjóði.

Á áætlunartímabilinu 2008-2010 er gert ráð fyrir samtals um 19,5 milljarða rekstrarafgangi A hluta fyrir fjármagnsliði. Áætluð sala byggingaréttar hefur hér mest áhrif og bætt afkoma Aðalsjóðs vegur þungt. Rekstrarafgangur eftir fjármagnsliði er áætlaður 25,3 milljarðar á áætlunartímabilinu, þ.e. 6,9 milljarðar árið 2008 eða 12,2% af heildartekjum, 10,2 milljarðar eða 16,7% af heildartekjum árið 2009 og 8,2 milljarðar eða 13,4% árið 2010.

Áætlað er að rekstrargjöld A hluta hækki frá árinu 2007 til 2010 um 7,1%. Þar af er áætlað að launakostnaður lækki um 0,7% sem skýrist einkum af lækkun á lífeyrisskuldbindingu. Á sama tíma er áætlað að annar rekstrarkostnaður hækki um 15,7%. Afskriftir hækka á tímabilinu um 19%, en vegna breytinga á útreikningi á húsaleigu lækka þær til að byrja með en fara síðan hækkandi. Stærstur hluti hækkunar árið 2010 skýrist af nýju húsnæði sem tekið verður í notkun á tímabilinu.

Frumvarp að þriggja ára áætlun Reykjavíkurborgar

• 2 blogg um fréttina

Bloggað um fréttina

• Auðun Gíslason: Einkennilegar fréttir af borgarstjórn!
• Svanur Guðmundsson: Nettóskuldir Reykjavíkurborgar 2005 10x meiri en ríkissjóðs.