Lögregluhundur fann fíkniefni

Karlmaður um tvítugt var handtekinn í austurborg Reykjavíkur í gærkvöld en í fórum hans fundust 2 grömm af ætluðu amfetamíni. Í framhaldinu var leitað í bíl mannsins og þá fann lögregluhundur um 30 grömm til viðbótar af sama efni sem voru falin í ökutækinu. Hjá manninum fundust einnig tæki og áhöld til neyslu og dreifingar á fíkniefnum.

Nokkur önnur fíkniefnamál komu til kasta lögreglunnar á höfuðborgarsvæðinu í gær. Um kvöldmatarleytið var þrítugur karlmaður tekinn í Hafnarfirði en hann er grunaður um fíkniefnamisferli. Á sama tíma voru höfð afskipti af karlmanni á sextugsaldri fyrir sömu sakir en sá var stöðvaður í miðborginni.

Um hádegisbil fóru lögreglumenn í íbúðarhús á sama svæði og handtóku þrjá karlmenn og eina konu. Á staðnum fundust ætluð fíkniefni, vopn og nokkrir munir sem taldir eru vera þýfi. Við leitina var notaður annar lögregluhundur.

Í nótt voru karlmaður og kona handtekin í Breiðholti og færð á lögreglustöð en í fórum þeirra fundust ætluð fíkniefni. Þá var karlmaður um fimmtugt stöðvaður í útjaðri borgarinnar í gærmorgun en á honum fundust líka ætluð fíkniefni.

• 2 blogg um fréttina

Bloggað um fréttina

• Snorri Bergz: Klámhundur?
• Hallgrímur Egilsson: hmmm