Sviptur ökuleyfi á fyrsta degi

Sautján ára piltur var tekinn fyrir hraðakstur í Ártúnsbrekku um tíuleytið í gærkvöld en bíll hans mældist á 136 km hraða. Það sem gerir mál piltsins dálítið sérstakt er sú staðreynd að ökuskírteini hans var gefið út í gær en ungi maðurinn er nýbúinn að fagna 17 ára afmæli sínu. Fyrir umferðarlagabrot af þessu tagi er 75 þúsund króna sekt og svipting ökuleyfis í einn mánuð, samkvæmt upplýsingum frá lögreglu á höfuðborgarsvæðinu.

Töluvert var um hraðakstur á höfuðborgarsvæðinu á síðasta sólarhring og voru tæplega fimmtíu ökumenn teknir fyrir þær sakir. Fleiri ungir piltar komu þar við sögu en einn 18 ára var stöðvaður á Hafnarfjarðarvegi en bíll hans mældist á 127 km hraða. Sami piltur var tekinn fyrir ámóta hraðakstur á Kringlumýrarbraut í síðasta mánuði. Þetta eru raunar ekki fyrstu umferðarlagabrot piltsins en hann fékk bílpróf síðasta sumar. Um haustið var hann sviptur ökuleyfi í þrjá mánuði en virðist lítið hafa lært af þeirri reynslu sé miðað við háttalag hans undanfarið, að sögn lögreglu.

Grófasta brotið í gær var hinsvegar framið á Vesturlandsvegi en þar mældist bíll tvítugs karlmanns á 148 km hraða. Sá hefur áður verið staðinn að hraðakstri en þó ekkert í líkingu við þetta.

• 4 blogg um fréttina

Bloggað um fréttina

• Vignir Arnarson: Já er ekki rétt að hækka bílprófsaldurinn?????
• Egill Rúnar Sigurðsson: Örugglega ekki við ökukennsluna að sakast.
• Óttarr Makuch: Er ekki allt í lagi
• Snorri Bergz: Hraðakstursplágan