Hægt að þekja vegakerfi Íslands fimm sinnum með dagblöðum og auglýsingapósti

Ársskammtur Íslendinga af dagblöðum og auglýsingapósti dugar til þess að þekja vegakerfi landsins rúmlega fimm sinnum. Að meðaltali berast 176 kg. af dagblaðapappír og auglýsingapósti berast inn á hvert heimili í landinu og er það 76% meira magn en barst inn á heimilin árið 2003. Þetta var rætt á stjórnarfundi Sorpu í dag og kemur fram á bloggsíðu Björns Inga Hrafnssonar, formanns borgarráðs.

Á vefsíðu Björns Inga segir að Fenúr, sem er fagráð um endurnýtingu og úrgang, hafi staðið fyrir rannsókn á síðasta ári, þar sem 17 heimili víðs vegar um landið tóku þátt í mælingum á magni pappírs sem berst inn um póstlúgur landsmanna. Til samanburðar er samskonar könnun sem gerð var árið 2003.

Í rannsókninni kom fram að árlega berist inn á íslensk heimili 32 kg. af auglýsingapósti en 144 kg. af dagblöðum. Fyrir fjórum árum var þetta magn umtalsvert minna, eða 100 kg. af pappír á hvert heimili, þar af 19 kg. af auglýsingapósti eða s.k. frípósti.

Sorpa lætur vinna rannsóknir árlega á sorpi því sem fellur til á heimilum höfuðborgarsvæðisins. Í fyrra er talið að dagblöð og tímarit hafi verið um 27% þess sem endaði í heimilissorpi höfuðborgarbúa, en árið 2003 var hlutfallið um 15%. Á sama tíma hefur endurvinnsla þeirra aukist úr 5.188 tonnum í 8.400 tonn á starfssvæði fyrirtækisins, eða um 62%. Segir á vefsíðu Björns Inga að pappírnyum fylgi umtalsverður kostnaður fyrir sveitarfélögin og sem hafi vaxið mjög á undanförnum árum, ekki síst fyrir tilstilli nýrra fríblaða sem dreift er í hvert hús.

• 3 blogg um fréttina

Bloggað um fréttina

• Sigurpáll Björnsson: Pappírsbrjálæði
• Vestfirðir: Malbik takk
• Kristján Hreinsson: Talandi um óþarfa