Reykingarnar höfðu slæmar afleiðingar

Nítján ára gamall piltur missti stjórn á bíl sínum á Reykjanesbraut í Kópavogi. Pilturinn var að reykja sígarettu undir stýri og missti hana frá sér. Við það fipaðist honum og hann ók á rammgerða girðingu sem er við veginn. Bíllinn skemmdist töluvert og voru skráningarnúmer hans fjarlægð.

Pilturinn og farþegi í bílnum voru fluttir á slysadeild en meiðsli þeirra voru ekki talin alvarleg.

Tuttugu og átta umferðaróhöpp voru tilkynnt til lögreglunnar á höfuðborgarsvæðinu á síðasta sólarhring. Einn var tekinn fyrir lyfjaakstur og annar fyrir að aka án þess að hafa öðlast ökuréttindi. Sá síðarnefndi framvísaði fölsuðum skilríkjum en samkvæmt þeim var ökumaðurinn rúmlega tvítugur. Við eftirgrennslan lögreglumanna kom hinsvegar í ljós að ökumaðurinn er aðeins 16 ára.

• 2 blogg um fréttina

Bloggað um fréttina

• Jóhannes Ragnarsson: Logandi sígaretta ofan í opna buxnaklauf?
• Jóna Á. Gísladóttir: Núna hætta náttúrlega allir að reykja