Áhrif Urriðafossvirkjunar rædd á fundi Landsvirkjunar og Flóahrepps

Fulltrúar sveitarstjórnar Flóahrepps og Landsvirkjunar hittust á fundi í morgun og ræddu skipulagsmál með tilliti til væntanlegrar kynningar á drögum að aðalskipulagi sveitarfélagsins fyrir íbúum þess. Viðræðum milli aðila, sem í gangi hafa verið, verður haldið áfram á næstunni um áhrif Urriðafossvirkjunar í Flóahreppi og hvernig við þeim verður brugðist. Í því sambandi er m.a. rætt um samgöngur og ferðaþjónustu á svæðinu, vatnsvernd, lífríki Þjórsár, landnotkun í nágrenni virkjunarinnar og mögulegar mótvægisaðgerðir.

Sveitarstjórn mun halda íbúafund þann 25. júní n.k. þar sem tillögur að aðalskipulagi verða kynntar með og án Urriðafossvirkjunar. Í framhaldi af því er gert ráð fyrir formlegu auglýsingar- og kynningarferli í samræmi við skipulagslög.

Í tilkynningu kemur fram að það er von viðræðuaðila að sameiginleg niðurstaða fáist sem fyrst um nauðsynlegar mótvægisaðgerðir og önnur samskipti aðila vegna fyrirhugaðrar Urriðafossvirkjunar.

Eins og Fréttavefur Morgunblaðsins greindi frá í gær þá samþykkti sveitarstjórn Flóahrepps á fundi sínum á miðvikudag að ekki verði gert ráð fyrir fyrirhugaðri Urriðafossvirkjun í drögum að aðalskipulagi fyrrum Villingaholtshrepps sem lögð verða fram til kynningar á íbúafundi í hreppnum mánudaginn 25. júní en í upphaflegri tillögu fyrrverandi hreppsnefndar Villingaholtshrepps var gert ráð fyrir virkjuninni.

• 1 blogg um fréttina

Bloggað um fréttina

• Valgerður Halldórsdóttir: Er Landsvirkjun með skipulagsvald?