SHÍ stendur fyrir Lifandi bókasafni á 17. júní

Stúdentaráð Háskóla Íslands (SHÍ) stendur fyrir Lifandi bókasafni í annað sinn á þessu ári þann 17. júní. Lifandi bókasafn starfar eins og venjulegt bókasafn, það er lesendur fá "lánaða" bók í takmarkaðan tíma. Munurinn felst í því að bækur Lifandi bókasafns eru fólk.

Bækurnar í Lifandi bókasafni eru fulltrúar hópa sem oft mæta fordómum og eru fórnarlömb misréttis og félagslegrar útilokunar. Á Lifandi bókasafni geta bækurnar ekki aðeins talað, heldur einnig svarað spurningum lesandans og þar að auki geta bækurnar jafnvel spurt spurninga og sjálfar fræðst, segir í fréttatilkynningu jafnréttisnefndar SHÍ.

Dæmi um bækur til útláns á Lifandi bókasafni á sunnudag:

• Barn barna - 13 ára strákur sem fæddist undir forsjá 10. bekkjar foreldra
• Ég er öruggur með karlmennsku mína - Karlkyns femínisti
• Minn tími er kominn – Kvenkyns femínisti
• Ég les varir þínar – Heyrnarlaus einstaklingur
• Mannkynhneigð – Tvíkynhneigður einstaklingur

Bókasafnið verður opið frá klukkan 13:00-16:00 á fyrstu hæð TM hússins, Aðalstræti 6.