Gekk berserksgang í lögreglubíl

Einn maður gistir nú fangageymslu lögreglunnar á Blönduósi fyrir árás á lögreglumann. Að sögn lögreglu var maðurinn sóttur út á Skagaströnd þar sem hann var til vandræða. Hann var ekki handtekinn en lögreglan bauðst til að flytja hann heim til sín á Blönduós. Á leiðinni þangað réðist maðurinn á annan lögreglumanninn í bílnum og lét höggin dynja á honum. Maðurinn sem var yfirbugaður mun hafa verið undir áhrifum einhverra eiturlyfja.

Lögreglan sagði að kveikt hafi verið á upptökubúnaði inni í bílnum og atvikið því vel skrásett með mynd og hljóði. Málið verður í rannsókn í dag og líklegt þykir að maðurinn verði úrskurðaður í gæsluvarðhald. Málið er litið mjög alvarlegum augum.

• 2 blogg um fréttina

Bloggað um fréttina

• Þorsteinn Gunnarsson: Blöndóslöggan í harkinu...
• Gísli Foster Hjartarson: Hvernig ganga menn berserksgang???